Filmda o'z kasbining fidoyisi, odamlarga haqiqiy psixologik yordam beruvchi inson, shifokor, o'z ishining bilimdoni, bir oila bekasi, dilbar ayol Umida haqida hikoya qilinadi.Afsuski, zamonadoshlarimiz orasida maishiy muammolar oldida ojiz qolayotgan, hayotda o'z o'rnini topishga qiynalayotgan, turmush zarbalariga dosh berolmayotgan odamlar bor. Ularning ba'zilari moddiy jihatdan qiynalsalar, ba'zilari kasalliklariga shifo izlab, tushkunlikka tushadilar... Muammolari turlicha bo'lgan turli taqdir egalari... Aksariyat hollarda, ular ruhiy madadga muhtoj... Film qahramoni esa ularga doim ruhiy yordam berishga tayyor inson. Mazkur filmdan o'rin olgan voqealardan birining qahramoni Lola ismli ayol. U yosh va chiroylı. Lola shahardagi yirik korxonalardan birida sidqidildan mehnat qiladi. Lekin korxona rahbari oilali inson uni o'z holiga qo'ymaydi. Hatto unga ikkinchi xotinlikni taklif etadi, o'z lavozimidan foydalanib unga bosim ham o'tkazadi. Lola ishdan bo'shashga majbur... U noiloj qoladi va Umidaga ruhiy yordam so'rab, murojaat etadi...